Գլխավոր էջ | Տեսակետ-Ասուլիս | Երևի կհասցնենք աշնանը անցումային արդարադատության գործիքակազմը հաստատել

Երևի կհասցնենք աշնանը անցումային արդարադատության գործիքակազմը հաստատել

By
Երևի կհասցնենք աշնանը անցումային արդարադատության գործիքակազմը հաստատել

Մեր զրուցակիցն է ԱԺ «Իմ քայլը» խմբակցության պատգամավոր Հովիկ Աղազարյանը

- Պարոն Աղազարյան, Դաշնակցությունը Հայաստան–Արցախ ռազմաքաղաքական դաշինք է նախաձեռնում։ Որպես նախկին դաշնակցական՝ ինչպե՞ս եք գնահատում։ Տեսակետ կա, որ հնարավոր է այդ համագործակցությունն այլ նպատակներով օգտագործվի։

- Նախ՝ Հայաստան-Արցախ ռազմաքաղաքական դաշինքը կարևոր բան է: Դա գործիքակազմ է, որ մենք որպես պետություն մեզ իրավունք վերապահենք պաշտպանելու մեր հայրենակիցների անվտանգությունն Արցախում: Ինչ վերաբերում է նրան, որ այդ համագործակցությունը կարող է օգտագործվել նաև քաղաքական նպատակներով, ապա ամեն մի քաղաքական գործիչ, քաղաքական ուժ կարող է ցանկացած իրավիճակ փորձել օգտագործել իր նպատակների համար:

Մասնավորապես, մենք տեսանք, թե ինչպես «Լուսավոր Հայաստանից» Գևորգ Գորգիսյանը ԱԺ ամբիոնից հայտարարեց, թե իրենց շնորհիվ է, որ Երևանի քաղաքապետը հետ է կանչել իր և մյուսների աշխատավարձերը բարձրացնելու նախագիծը: Եթե երեք մարդ կարող է այդքան մեծ կարևորություն ունեցող հարց որոշել, նշանակում է մեզ մոտ ամեն ինչ շատ լավ է: Բոլոր դեպքերում, ուզում եմ ասել, որ կփորձեն քաղաքական ուժերն օգտագործել ցանկացած իրավիճակ իրենց շահերի համար: Այնպես որ այդտեղ դատապարտելի բան չեմ տեսնում:

- Ռոբերտ Քոչարյանը հարցազրույց է տվել ու հայտարարել, թե Հայաստանում լուրջ ընդդիմադիր բևեռ է ձևավորվում և ինքը պատրաստվում է միանալ այդ բևեռին: Դուք նման նախադրյալ տեսնո՞ւմ եք և ո՞ր քաղաքական ուժերին եք տեսնում այդ բևեռում:

- Ես տեսնում եմ որոշ անհատների, որ կարող են այդ բևեռի շուրջ համախմբվել, բայց վստահ եմ, որ իրենք հաջողություն չեն ունենա: Ես չգիտեմ, թե 4 տարի հետո, երբ ԱԺ լիազորությունների ժամկետն ավարտվի, ի՞նչ քաղաքական իրավիճակ կլինի, որ ուժն ինչ դիրքերում կլինի, ինչ վարկանիշ կունենա ժողովրդի մոտ, բայց այն, որ ՀՀԿ-ն և մասնավորապես Ռոբերտ Քոչարյանի շրջապատը ոչ մի հաջողություն չեն ունենա, դա հաստատ կարող եմ ասել: Իհարկե, կարող է ժողովուրդը նաև մեզանից որոշակի հիասթափություն ապրի, մենք անկում ունենանք մեր հավաքած տոկոսների իմաստով, բայց բոլոր դեպքերում այդ ուժերը հաջողություն ունենալու շանս չեն ունենա, որովհետև ժողովուրդը շատ լավ է ճանաչում նրանց:

- Հայաստանի և Արցախի իշխանությունների մեջ որոշակի տարանջատում, հակասություններ չե՞ք տեսնում՝ հաշվի առնելով, որ էլ Արցախի երկու նախագահները դիմում են ՀՀ գլխավոր դատախազին Ռոբերտ Քոչարյանին ազատ արձակելու հարցով, այնտեղի պաշտոնյաները ստորագրահավաք են կազմակերպում, անընդհատ կոչ են անում ազատ արձակել Ռոբերտ Քոչարյանին: Կա՞ խզում Հայաստանի և Արցախի ղեկավարների միջև, թե ոչ:

- Չէի ասի, թե խզում կա, բայց կա տարբեր հարցերի շուրջ տարբեր տեսակետների դրսևորում: Ես կարող եմ վստահաբար ասել, որ նույն Արցախում կան բազմաթիվ անհատներ, քաղաքական գործիչներ, որոնք չեն կիսում իրենց ղեկավարների մոտեցումները, բայց շատ բարձրաձայնելու, շատ դրսևորվելու հնարավորություն չունեն:

Հետևաբար, եթե Արցախի գործող և նախկին նախագահները դիմել էին Ռոբերտ Քոչարյանի խափանման միջոցը փոխելու հետ կապված, դա չի նշանակում, որ բոլորն են այդ տեսակետին համաձայն: Չեմ ուզում խախտել անմեղության կանխավարկածը, բայց ինձ համար Ռոբերտ Քոչարյանի արած քայլերը շատ լուրջ հակապետական քայլեր են եղել և իրենց պատասխանն անպայման պետք է գտնեն, որպեսզի մյուս բոլորն էլ հիմա ու հետագայում միշտ իմանան, որ գալու է պատասխան տալու ժամանակը:

Թող գործընթացները գնան, ամեն ինչ պարզվի: Ռոբերտ Քոչարյանն իր անձնական որակներով և ֆինանսական հնարավորություններով շատ լուրջ ուժ է ներկայացնում իրենից, և ես վստահ եմ, որ եթե իր խափանման միջոցը փոխվի, և նա գտնվի ազատության մեջ, ինքը շատ լուրջ ազդեցություն կարող է ունենալ իրավապահ մարմինների կողմից իրականացվող գործընթացների վրա: Հետևաբար, ես կարծում եմ, որ ինքը պետք է մնա կալանքի տակ:

- Տեսակետ կա, որ իշխանությունը թավշյա հեղափոխությունից հետո ամենակարևոր խնդիրը չկարողացավ լուծել. խոսքը տարբեր անօրինական ճանապարհներով ձեռք բերված հարստությունների մասին է, որոնք այսօր ուղղվում են հեղափոխության դեմ: Այստեղ խնդիր չե՞ք տեսնում, որ մասնավորապես, անցումային արդարադատությունը կյանքի չի կոչվում:

- Անցումային արդարադատություն իրականացնելու համար պետք է համապատասխան գործիքակազմ լինի, որովհետև առանց դրա կլինի մարդու իրավունքների խախտում: Մենք երևի կհասցնենք աշնանը անցումային արդարադատության գործիքակազմը հաստատել, որից հետո կիրականացնենք այդ բոլոր գործընթացները:

- Արդեն մեկ տարի անցել է, ուշացած չե՞ն այդ քայլերը:

- Ոչ, ոչ, ի՞նչ է փոխվել դրանից հետո: Իհարկե, այս ընթացքում ժողովրդի մոտ մեր վստահության գործակիցը մի փոքր նվազել է այդ իմաստով, որովհետև ժողովուրդը հենց այս պահին ուզում է իր սպասելիքներն իրականություն դարձած տեսել, բայց մենք պետք է համբերատարությամբ լցվենք և պետք է ամեն բան օրենքով հաստատված կարգով անենք: Որպեսզի մի հարցը չլուծենք երկուսը ավելացնելով: Այստեղ շտապելու բան չկա, ուշանալու խնդիր չունենք:

- Թավշյա հեղափոխությունը այդ առումով մեծ հնարավորություններ չէ՞ր ստեղծում՝ շատ արագ այդ խնդիրներին լուծում տալու առումով:

- Շտապողականությունը կարող է սխալների բերել: Ես միշտ բարձրացնում եմ հարցը, որ այս տարիներին ժողովրդից թալանվածը պետք է հետ վերադարձվի ժողովրդին: Եթե դա արվի արագ՝ կիրառելով իշխանական լծակներ, մենք այդ դեպքում լիքը սխալներ, ինչպես նաև կորուստներ կունենանք տնտեսության մեջ: Մեր նպատակը չէ վերացնել բիզնեսմեններին, մեր նպատակն է նրանց բերել օրենքի դաշտ, և դրան զուգահեռ նրանց հորդորել, պահանջել, որ տարիների ընթացքում այն եկամուտները, որոնք իրենք ձեռք են բերել ոչ օրինական ճանապարհներով, դրանց հետ կապված ընդհանուր դիրքորոշում ճշտենք, որպեսզի խնդիրները լուծենք:

ՍԻՐԱՆՈՒՅՇ ՊԱՊՅԱՆ, Հարցազրուցավար

  • Ուղղարկել ընկերոջ Ուղղարկել ընկերոջ
  • Տպագրելու տարբերակ Տպագրելու տարբերակ
  • Տեքստային տարբերակ Տեքստային տարբերակ

Պիտակներ:

Պիտակներ չկան

Գնահատական

0