Գլխավոր էջ | Տեսակետ-Ասուլիս | Վիեննան կրկին փակեց Պուտինի եւ Էրդողանի ճանապարհը Ղարաբաղում

Վիեննան կրկին փակեց Պուտինի եւ Էրդողանի ճանապարհը Ղարաբաղում

By
Վիեննան կրկին փակեց Պուտինի եւ Էրդողանի ճանապարհը Ղարաբաղում

Չնայած Պուտինն ու Թրամփն առանձին չեն հանդիպել, Ռուսաստանի ու ԱՄՆ նախագահները կարողացել են Սիրիայի վերաբերյալ հայտարարության տեքստ համաձայնեցնել, որում Ռուսաստանի համար ցանկալի բառերը կան՝ Սիրիայի տարածքային ամբողջականության պահպանում:

Երկու նախագահները պայմանավորվել են Իսլամական պետության դեմ պայքարն ավարտին հասցնել, համաձայնեցնել երկրի բաժանումը «ապաէսկալացված գոտիների», կամ այլ կերպ ասած՝ ազդեցության գոտիների, սակայն դրանով հանդերձ հայտարարվել է, որ Սիրիան չեն կիսելու:

Համենայնդեպս, ոչ հիմա: Հնարավոր է, եթե Իրաքյան Քրդստանի հանրաքվեն այլ ելք ունենար, Պուտինն ու Թրամփն այլ բան կպայմանավորվեին: Սակայն առայժմ որոշել են չխանգարել միմյանց ամրապնդվելու Մերձավոր Արեւելքում՝ չփոփոխելով պետական սահմանները:

Պուտինը չէր թաքցնում գոհունակությունը Թրամփի հետ պայմանավորվածության մասին պատմելիս: Ճիշտ է, դեռ հասկանալի չէ, թե ինչ է Ռուսաստանը զիջել դրա դիմաց: Պատահական չէ, որ Ուկրաինայի արտաքին գործերի նախարար Պավել Կլիմկինը նույն օրը հայտարարել է, որ պատրաստ է Դոնբաս խաղաղապահներ բերելու մասին բանաձեւի նախագիծը: Լրատվամիջոցները հայտնել են, որ խոսքը 20 000 միջազգային խաղաղապահների մասին է, որոնք կանգնելու են Ռուսաստանի եւ Ուկրաինայի սահմանին՝ ի հեճուկս Մոսկվայի:

Միայն կռահել կարելի է, թե ինչով է պայմանավորված «տարածքային» սառեցումը: Դա եւ աճող կոնֆլիկտն է Սաուդյան Արաբիայի եւ Լիբանանի միջեւ, եւ պաղեստինյան հարցը լուծելու ԱՄՆ ծրագրերը: Որոշ արեւելյան վերլուծաբաններ ենթադրում են, որ Պաղեստինի հարցը ցանկանում են լուծել եգիպտական Սինայի հաշվին՝ ոչ ի վնաս Իսրայելի: Իսկ Պաղեստինի հարցի լուծումը կարող է Մերձավոր Արեւելքում նոր կարգի սկիզբ դառնալ:

Դա սակայն, ապագայի համար: Առանց վերջնական լուծման սառեցում, հավանաբար, նաեւ Ղարաբաղին է սպասվում: Արդեն մի քանի շաբաթ արտահոսքեր են թողնվում, որ Պուտինն ու Էրդողանը որոշել են նոյեմբերի 13-ին հանդիպել Սոչիում եւ «լուծել» Ղարաբաղի հարցը: Խոսքը տարածքային զիջումների, ԵՏՄ-ին Ադրբեջանի անդամակցության եւ ռուս խաղաղապահների վերաբերյալ ինչ-որ նախագծի մասին է:

Սակայն այդ հանդիպումից մի քանի օր առաջ Վիեննայում տեղի է ունեցել ԵԱՀԿ Մշտական խորհրդի նիստը, որտեղ ԱՄՆ-ն, Ռուսաստանը, Եվրամիությունն ու Հայաստանը զարմանալիորեն նման դիրքորոշում են հայտնել: Բոլոր կողմերը հայտարարել են Ղարաբաղում ԵԱՀԿ առաքելության ընդլայնման ու հակամարտության գոտում հետաքննություների մեխանիզմի մասին:

Այդ մեխանիզմների ներդրումը նշանակում է հրաժարում ռազմական գործողություններից, որը կսառեցնի իրավիճակը եւ թույլ կտա շարունակել բանակցություններն արդեն նոր աշխարհակարգի մասին գլոբալ համաձայնությունների համատեքստում:

Վիեննայում ԵԱՀԿ Մշտական խորհուրդը, փաստացի, փակել է Պուտինի եւ Էրդողանի միջեւ անջատ պայմանավորվածությունների ճանապարհը, որին կարող էր համաձայնվել Հայաստանը: Պատահական չէ, որ ադրբեջանական մամուլում գրեթե անդրադարձ չկա ԵԱՀԿ Մշտական խորհրդում կողմերի ելույթներին: Հնարավոր է, Բաքվում եւս թեթեւացած շունչ են քաշել, որովհետեւ Էրդողան-Պուտին պլանի համաձայնեցման դեպքում տարածաշրջանում մեծ անկայունություն կարող էր սկսվել:

Անկասկած, Պուտինն ու Էրդողանը դեռ կարող են անջատ պայմանավորվել ու անգամ Հայաստանին ստիպել ինչ-որ հայտարարություններ անել, սակայն ԱՄՆ ու ԵՄ կոշտ դիրքորոշումը վկայում են, որ համաշխարհային մայրաքաղաքներում հասկանում են այդ հնարավորությունը եւ իրադարձությունների նման զարգացումը կանխելու ծրագրեր ունեն:

Նաիրա Հայրումյան, Մեկնաբան

Մեկնաբանություններ (0 posted)

total: | displaying:

Ձեր մեկնաբանությունը

  • Bold
  • Italic
  • Underline
  • Quote

Մուտքագրեք նկարում առկա նիշերը

Captcha
  • Ուղղարկել ընկերոջ Ուղղարկել ընկերոջ
  • Տպագրելու տարբերակ Տպագրելու տարբերակ
  • Տեքստային տարբերակ Տեքստային տարբերակ

Պիտակներ:

Պիտակներ չկան

Գնահատական

0