Գլխավոր էջ | Տեսակետ-Ասուլիս | Թեհրանը հանձնեց ծանր քննությունը, իսկ «հնգյակը» խաղից դուրս մնաց

Թեհրանը հանձնեց ծանր քննությունը, իսկ «հնգյակը» խաղից դուրս մնաց

By
Թեհրանը հանձնեց ծանր քննությունը, իսկ «հնգյակը» խաղից դուրս մնաց

«Մեր բոլոր գործողությունները համազոր էին Ղասեմ Սոլեյմանիի սպանությանը: Դրանք ավարտվել են: Եթե ԱՄՆ-ն այլևս ռազմական գործողություններ չնախաձեռնի Իրանի նկատմամբ, մեր կողմից նման գործողություններ նույնպես չեն լինի», հայտարարել է ՄԱԿ-ում Իրանի մշտական ներկայացուցիչ Մաջիդ Թախտ Ռավանչին:

Դրանից առաջ ուղերձ էր հղել ԱՄՆ նախագահ Դոնալդ Թրամփը, Իրաքում ԱՄՆ ռազմաբազաների իրանյան հրթիռակոծումից հետո, որի հետեւանքով մարդկային կորուստ չի եղել: Թրամփը հայտարարել է, որ Իրանը նահանջում է ու դա լավ է: Միաժամանակ, նա դիմել է Իրանի ղեկավարությանն ու ժողովրդին. «Մենք ցանկանում ենք, որ դուք մեծ ապագա ունենաք, այնպիսի ապագա, որին արժանի եք՝ ներդաշնակ լինելով աշխարհի ազգերի հետ։ ԱՄՆ-ն պատրաստ է գրկաբաց ընդունել խաղաղությունը բոլոր նրանց հետ, ովքեր փնտրում են այն»:

Թրամփը հայտարարել է նաեւ, որ քանի դեռ ինքը նախագահ է, Իրանը չի ունենա միջուկային զենք: Նա կոչ է արել նաեւ ԵՄ երկրներին ու Ռուսաստանին չեղարկել Իրանի հետ միջուկային համաձայնագիրը, որից ԱՄՆ դուրս եկավ Թրամփի նախագահի պաշտոնը ստանձնելուց հետո, հայտարարելով, որ այն չի բխում ԱՄՆ շահից:

Նախագահ Թրամփի կոչը հատկանշական է, քանի որ գեներալ Քասիմ Սուլեյմանիի սպանությունից հետո Իրանը ինքն էր հայտարարել միջուկային համաձայնագրից դուրս գալու մասին: Այսինքն, Իրանն առաջ էր անցել «հնգյակից»՝ ում դիմում է Թրամփը: Մեծ հաշվով, «հնգյակը» դուրս է մնացել խաղից, եւ Թրամփի կոչը այդ իրողության «ճանաչում» է, «իրողությունների ճանաչման» թրամփյան մոտեցման համատեքստում:

ԱՄՆ նախագահի ուղերձը իրական քաղաքականության տողատակային իմաստով այլ բան չէ, քան ազդարարում ամերիկա-իրանյան ռազմավարական նոր խաղի մասին՝ առանց «հնգյակի»: Իրանի արձագանքը գործնականում Իրանի արձագանքն է Թրամփի ուղերձին: Թեհրանն ընդունում է ամերիկա-իրանյան նոր խաղի Թրամփի առաջարկը: Թեեւ ԱՄՆ նախագահը բացառում է իր նախագահության ընթացքում Իրանի միջուկային զենք ստանալը, այդուհանդերձ մեծ հավանականությամբ ամերիկա-իրանյան նոր խաղի օրակարգում լինելու է Իրանի միջուկային զենք ունենալու իրավունքի հարցը:

Մերձավորարեւելյան թեժ օրերը այդ հարցում գործնականում Իրանի քննությունն էին, որը Թեհրանը հանձնեց: Իրանը, չնայած վարչակազմին վերագրվող այսպես ասած ֆանատիկ անկանխատեսելիությանը, ցույց տվեց, որ լիովին ի զորու է լինել աշխարհքաղաքական խաղի լուրջ եւ պատասխանատու խաղացող, որն ի վիճակի է ամենաբարդ ու զգայական իրավիճակներում անգամ առաջնորդվել ռազմավարական պատասխանատվությամբ:

Փոքր ինչ կոպիտ բնորոշմամբ՝ սպանված գեներալի հիշատակի հանդեպ հարգանքով հանդերձ, Քասիմ Սոլեյմանին Թեհրանի համար գործնականում կարող է լինել միջուկային զենք ունենալու գինը: Մերձավորարեւելյան ռեգիոնում հավասարակշռության ռազմավարական խնդիրը կարծես թե անխուսափելի է դարձնում Իրանի այդ կարողության անհրաժեշտությունը, քանի որ ռեգիոնում որոշակի իրողություններ ճանաչող Միացյալ Նահանգները թերեւս այդ միջոցով պետք է նաեւ մի շարք իրողությունների հետ հաշվի նստեցնի այլ խաղացողների, այդ թվում դաշնակից Իսրայելին:

ՀԱԿՈԲ ԲԱԴԱԼՅԱՆ, Մեկնաբան

  • Ուղղարկել ընկերոջ Ուղղարկել ընկերոջ
  • Տպագրելու տարբերակ Տպագրելու տարբերակ
  • Տեքստային տարբերակ Տեքստային տարբերակ

Պիտակներ:

Պիտակներ չկան

Գնահատական

0